Rüşvət alan rəis köməkçisinin SƏS YAZISI - “Narkotiklə” tutub, 50 manat cərimə yazdılar

"Lider” televiziyasının Qarabağ bölgəsi üzrə operatoru vəzifəsində çalışmış İlqar Fərmanlının qardaşı, 2-ci qrup əlil Azər Fərmanlının Bərdə rayon Polis Şöbəsində yaşadığı hadisə ilə bağlı qalmaqal böyüyür.


Daxili İşlər Nazirliyinin A. Fərmanlının öz dostu Orxan Quliyevi təhqir etməsi, buna görə polis bölməsinə aparılmaları ilə bağlı açıqlamasından sonra O. Quliyev BakiPost.az-a müraciət edib.


O bildirib ki, nazirliyin yaydığı açıqlama başdan-ayağa yalandır: "Nazirlik bildirir ki, guya, Azər məni təhqir edib, nalayiq ifadələr işlədib. Biz Azərlə uşaqlıqdan dostuq. Elə bir şey mümkün deyil. Nə mən Azərə qarşı elə hərəkət edərəm, nə də o mənə. Bizi heç nədən şərləyiblər”.

 



Həmin gün A.Fərmanlı ilə birlikdə şöbəyə aparıldığını deyən O.Quliyev hadisələrin necə cərəyan etdiyini belə nəql edib:"Azər məni öz maşınıyla evə düşürməyə gətirirdi. Yanacaq doldurma məntəqəsinin yanında 02 BK 344 dövlət nömrə nişanlı Vaz 21 07 markalı maşınla qarşımızı kəsdilər. Arxadan da bir maşınla bizi təqib edirmişlər. Saxlayan kimi hamısı tökülüşdü. Azərdən maşının sənədlərini istədilər. O da bizi saxlayanın yol polisi olmadığı üçün sənədləri vermədi. Həm də sənəd istəyənlər mülki geyimdə idilər. Mülki geyimlilərdən biri də Elnur idi. O özünü rəisin köməkçisi kimi təqdim elədi. Azər yenə də sənədləri verməyəndə bizi bölməyə gətirdilər”.

 

 

 

O.Quliyev A.Fərmanlı ilə birlikdə şöbədə təhqir edildiyini və döyüldüyünü qeyd edib: "Bizi şöbədə təhqir etdilər, söydülər, yumruq-təpik vurdular. Döyənlər də əsas Emin, Rəşad və Elnur idi. Bizə deyirdilər ki, nəşə çəkmisiniz, boynunuza alın. Amma bizi tanıyan hamı bilir ki, elə şeylərlə əlaqəmiz yoxdur.

Heç bir əsasları olmadan bizi bölməyə aparıb, başımıza min oyun açıblar. DİN-dən də açıqlama verirlər ki, guya, biz dava edirmişik. Onların dediyi heç bir şey olmayıb.


Deyirlər ki, guya 1-də bizi salıblar bölməyə, 3-də buraxıblar. Elə şey olmayıb. 1 sutka qalmışıq orada. İlqar müəllimdən 2000 manat rüşvət alıb, günorta 14:00-da güclə buraxdılar”.


Yerigəlmişkən, bildirək ki, Daxili İşlər Nazirliyinin Daxili Təhqiqatlar İdarəsi İlqar Fərmanlının qardaşı Azər Fərmanlının polis şöbəsində işgəncələrə məruz qalmasıyla bağlı şikayətinə cavab verib.

 



İdarənin rəisi, general Sahib Mirzəyev adından İ.Fərmanlıya göndərilən məktubda bildirilib ki, İ.Fərmanlının şikayəti araşdırılıb: "Müəyyən olunub ki, qardaşınız Azər Fərmanlı 14.09.2016-cı il tarixdə saat 01:00 radələrində Bərdə şəhəri, Koroğlu küçəsində tanışı Orxan Quliyevlə mübahisə edib, nalayiq ifadələr işlətməklə asayişi pozduğundan həmin ərazidə xidmətdə olan Bərdə RPŞ İTB-nin polis nəfərləri Emin Mustafayev, Rəşad Məhərrəmov tərəfindən saxlanılaraq polis şöbəsinə gətirilib, polis sahə rəisi İlqar Əliyev tərəfindən barəsində İnzibati Xətalar Məcəlləsinin 510-cu maddəsi ilə protokol tərtib olunub, qardaşınız izahatında törətdiyi xətanı etiraf edərək, peşmançılıq çəkdiyini bildirdiyindən o, 50 manat cərimələnib.


Aparılmış xidməti təhqiqat nəticəsində Bərdə RPŞ-nin əməkdaşları tərəfindən qardaşınız A.Fərmanlının narkotik vasitələrin qanunsuz dövriyyəsi ilə məəşğul olmaqda təqsirləndirilərək sərbəst buraxılması müqabilində 2000 manat alınması barədə göstərdiyiniz xüsusatlar təsdiqlənməyib”.


İ.Fərmanlı DİN-in bu cavabıyla bağlı saytımıza yenidən açıqlama verib. O, qurumdan gələn məktuba etiraz edib: "Elnur barədə bir kəlmə də məlumat verilmir. Elnur məsələsi gizlədilir.

 

Ortada səs yazısı var, şahidlər var, amma bunlar deyir elə şey yoxdur. Əgər pul almamışdısa, o səs yazısında mənə bunu deyərdi.


Araşdırma aparıblar, lap yaxşı, onda sual verirəm, Elnur hanı? Niyə üzə çıxarmırlar? Mən səhvəmsə Elnuru çıxarsınlar ortaya, mən səhv olum. Çıxarmırlarsa, demək ki, nəsə güdürlər. O adamın üzə çıxarılması rəisin bütün qara işlərinin ortaya tökülməsi deməkdir.

 

Mən şahid yanında vermişəm pulu. Bunlar araşdırma üçün əsas sayılmır? Əgər sayılmırdısa, niyə gəlib ifadələrimizi alırdılar? Belə çıxır ki, gəlib rəisdən öz "haqq”larını alıb, ciblərini doldurub, çıxıb gediblər”.

 

İ.Fərmanlı Elnur adlı şəxs vasitəsilə polis bölməsinə pul verdiyi ilə bağlı danışığının səs yazısını sübut olaraq redaksiyamıza göndərib. Həmin səs yazısını təqdim edirik:

 


Xatırladaq ki, BakiPost.az bir neçə gün əvvəl İlqar Fərmanlının qardaşı Azər Fərmanlının polis şöbəsində işgəncələrı məruz qalmasıyla bağlı yazı tirajlamışdı. Bildirimişdik ki, ötən ilin sentyabrın 14-də özünü Bərdə rayon Polis İdarəsinin rəisinin köməkçisi kimi təqdim edən Elnur adlı şəxs A.Fərmanlı və onun maşında olan dostu Orxan Quliyevi narkotiklə şərləyərək, şöbəyə aparıb, daha sonra isə fiziki təzyiqlərə məruz qoyub. İ. Fərmanlı məsələ ilə bağlı prezident İlham Əliyevə müraciət ünvanlayıb. Müraciətdə bildirilib ki, polis əməkdaşları onlardan 2000 manat aldıqdan sonra sərbəst buraxıblar.


Daxili İşlər Nazirliyinin mətbuat xidmətinin rəhbəri Orxan Mansurzadə isə məsələnin təhrif olunduğu ilə bağlı açıqlama yayıb. Bildirib ki, rayon sakini Azər Fərmanlı ictimai qaydanı pozan xırda xuliqanlıq hərəkətləri etməklə həmyerlisi Orxan Quliyevin ünvanına nalayiq ifadələr işlədib. Buna görə də hər iki şəxs polis bölməsinə aparılıb.


Tərəflərin izahatı alındıqdan sonra Azər Fərmanlı barəsində İnzibati Xətalar Məcəlləsinin müvafiq maddəsi ilə protokol tərtib edilib və o, 50 manat məbləğində cərimə edilib. Araşdırma bitdikdən, yəni təxminən 2 saat sonra, saat 03:05-də A.Fərmanlı RPŞ-ni tərk edib.

 

Bakı Post

Şikayətinizi bizə yazın
Xəbərlərinizi bizə göndərin
WhatsApp: +994772701199

XƏBƏR LENTİ

24 Noyabr 2017
23 Noyabr 2017
Bütün xəbərlər
Bütün xəbərlər