Ru
13:27 / 21 Sentyabr 2017

Generala “şərəfsiz dedi, butulkalar göydə uçuşdu - MTN məhkəməsində dava

1306
Bu gün Bakı Hərbi Məhkəməsində ləğv edilmiş Milli Təhlükəsizlik Nazirliyinin Antiterror Mərkəzinin rəisi, general-mayor Elçin Quliyev və Antiterror Mərkəzinin əməkdaşı, polkovnik Azər Mehdiyevin cinayət işi üzrə məhkəmə prosesi davam etdirilib.


BakuPost.az-ın APA-ya istinadən məlumatına görə, hakim Elbəyi Allahverdiyevin sədrliyi ilə keçirilən prosesdə şahid qismində 70 saylı Notarial Kontorunun notariusu Nadir Fərhadov ifadə verib. O, zərərçəkmiş Əsgər Əliyevin epizodu üzrə danışaraq qeyd edib ki, orda torpaq alqı-satqısı hüquqi sənədlərlə həyata keçirilib. Şahid bu müqavilənin imzalanmasında MTN-də işləmiş Heydər adlı şəxsdən göstəriş aldığını da deyib.


Prokuror Fəhmin Hümbətov şahidin ifadəsində bəzi ziddiyyətlər olduğunu bildirib. Qeyd olunub ki, ibtidai istintaqa verilən ifadədə göstərilib ki, N. Fərhadov alqı-satqı müqaviləsini MTN-dən gələn tapşırıqla həyata keçirib.


Daha sonra Elçin Quliyevin vəkili vəsatətlə çıxış edərək, alqı-satqı müqaviləsinin məhkəməyə təqdim olunmasını istəyib.


Məhkəmə vəsatəti təmin edib.


Zərərçəkmiş Mətləb Mustafayev epizodu üzrə şahid qismində Əbülfəz Məmmədov ifadə verib. O, M. Mustafayevin qardaşı, intihar etmiş MTN polkovniki Malik Mustafayevlə yaxın dost olduğunu deyib. Şahid M. Mustafayevə E. Quliyev tərəfindən təzyiq edildiyini deyərək, onun ölümündə MTN generalını ittiham edib: "Ölümündən bir gün əvvəl Maliklə görüşdüm. O, özünü öldürəcəyini deyirdi. Rəisi Elçin Quliyev tərəfindən qardaşı Mətləb Mustafayevə görə təzyiq olunduğunu bildirirdi. Mənə dediyinə görə, Elçin Quliyev onun qardaşından Əli Nağıevin əleyhinə ifadə almağa çalışırmış”.


Bu zaman E. Quliyev şahidə etiraz edib və onu yalan danışmaqda ittiham edib: "Siz heç Əli Nağıyevi tanıyırsınız? Əl Nağıyevlə bağlı Mətləbdə nə məlumat ola bilərdi ki, mən onu almaq istəyim? Siz özünüz Malik Mustafayevin ölümündən dərhal sonra istintaqa ifadə vermisiniz. Heç orda mənim adımı çəkməmisiniz. İndi niyə adımı hallandırırsınız? Deməli, bu şahid təzyiqlə ifadə verir və onun ifadəsi qərəzlidir. Orda sənə kimsə hədə-qorxu gəlirdi ki, səni öldürəcəyik, başını kəsəcəyik?”


Şahid isə "o qədər baş kəsməyə öyrəşmisiniz ki”, deyə E. Quliyevə cavab verib.


Hakim şahiddən istintaqda E. Quliyevin adını niyə çəkmədiyini soruşub. Şahid bunun səbəbini deməyib.


Daha sonra M. Mustafayevin epizodu üzrə keçmiş MTN-in Təhqiqat İdarəsinin rəisi olmuş Mövsüm Əsgərov ifadə verib. O, ifadəsində M. Mustafayevin evindən silah tapıldığını deyib.


Prosesdə fasilə elan olunub.


Ləğv edilmiş Milli Təhlükəsizlik Nazirliyi (MTN) Antiterror Mərkəzinin rəisi, general-mayor Elçin Quliyev və Mərkəzin əməkdaşı, polkovnik Azər Mehdiyevin cinayət işi üzrə məhkəmə prosesi fasilədən sonra davam edib.


Elçin Quliyev məhkəmədə bildirib ki, bura gələn şahidlər öyrədilib: "Bunların hamısı papaq altında oturanlardır”.


Maqsud Mahmudov isə buna etiraz edib: "Sənin kimi şərəfsiz, ləyaqətsiz generallar Heydər Əliyevin yaratdığı MTN-i dağıtdılar. Sən o şöbədə nə işləmisən? Hamı İlqar elədiyini deyir. Amma epizodları sən danışırsan”.


Bu zaman Elçin Quliyev yerindən qalxaraq zərərçəkənlərin hamısını dələduz adlandırıb: "Bunlar hamısı prokurorun öyrətdikləri adamlardır. Bığ altında yatanları bura gətiriblər”.


Mübahisə qızışıb. Elçin Quliyev və Maqsud Mahmudov bir-birinə su butulkasını atıblar.


Hali Maqsud Mahmudovu zaldan çıxarılıb.


Proses sabah davam edəcək


Qeyd edək ki, Elçin Quliyev MTN-in Antiterror Mərkəzinin rəisi olub. Daha sonra MTN-lə bağlı aparılan istintaq zamanı o tutduğu vəzifədən azad edilərək nazirliyin Heydər Əliyev adına Akademiyasının kafedra rəisi təyin edilib. Ondan sonra isə şübhəli şəxs qismində saxlanılaraq həbs edilib.


Elçin Quliyevə Cinayət Məcəlləsinin 145.3-cü (qanunsuz azadlıqdan məhrum etməklə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olma), 181.3.1-ci (mütəşəkkil dəstə tərəfindən quldurluq törətmək), 181.3.2-ci (külli miqdarda əmlak əldə etmək məqsədi ilə quldurluq törətmək), 182.3.1-ci (mütəşəkkil dəstə tərəfindən hədə-qorxu yolu ilə tələb etmə), 182.3.2-ci (külli miqdarda əmlak əldə etmək məqsədi ilə hədə-qorxu yolu ilə tələb etmə), 302.2-ci (əməliyyat-axtarış fəaliyyəti haqqında qanunvericiliyi pozma, eyni əməllər informasiyanın gizli yolla götürülməsi üçün nəzərdə tutulan xüsusi texniki vasitələrdən istifadə edilməklə törədildikdə), 308.2-ci (vəzifə səlahiyyətlərindən sui-istifadə etmək), 309.2-ci (vəzifə səlahiyyətlərini aşmaqla, zor tətbiq etməklə və ya zor tətbiq etmə hədəsi ilə törədildikdə, yaxud silah və digər xüsusi vasitələrdən istifadə etməklə törədildikdə və ya ağır nəticələrə səbəb olma), 311.3.1-ci (qabaqcadan əlbir olan bir qrup şəxs və ya mütəşəkkil dəstə tərəfindən rüşvət alma), 311.3.2-ci (təkrar rüşvət alma), 311.3.3-cü (külli miqdarda rüşvət alma) maddələri ilə ittiham elan olunub.
Şərhlər
Bizi telegram-da izləyin
Bizi facebook-da izləyin
Bizi tiktok-da izləyin
Bizi youtube-da izləyin





Son xəbərlər
Çox oxunanlar
Son xəbərlər