Ödənişi 2 ay gecikdi, maşını əlindən alındı - VİDEO

BakuPost-un "Xezerxeber.az”a istinadən məlumatına görə, paytaxtın Sabunçu rayonunda yaşayan Xaliq Əliyev ötən ilin avqust ayında özünə məxsus minik avtomobilini satmaq üçün Sumqayıtdakı maşın bazarına aparıb. Orada başqa bir minik avtomobilini almaq istəyib və həmin maşının sahibi ilə barter barədə razılığa gəlib.

Çatışmayan 2200 manatı ödəmək üçün bazarda "makler” işləyən Emil Yolçuyev adlı şəxs Xalid Əliyevə dəstək olub. O qeyd edib ki, əvəzində X. Əliyevdən 20 ay müddətində hər ay 280 manat, nəticədə də 5600 manat pul alacaq. Maşın da E. Yolçuyevin adına qeydiyyata alınacaq və Xalid Əliyev pulu tam ödəyənə qədər sürmək üçün etibarnamə verəcək. Onlar razılığa gəliblər və X. Əliyev 7 ay bu pulu ödəyib.

Xalid Əliyev deyir ki, son 2 ayda maşının təmirinə xeyli pul xərclədiyi üçün götürdüyü vəsaitin ödənilməsində gecikmə baş verib. O, Emil Yolçuyevə də tezliklə həmin pulu ödəyəcəyini bildirib. Həmin ərəfədə Xalid Əliyevin aldığı maşın qayda pozuntusuna görə cərimə meydançasına aparılıb. O, maşını cərimə meydançasından götürməyə getdikdə isə bildirilib ki, avtomobili sahibi Emil Yolçuyev aparıb.

Məsələ ilə bağlı Emil Yolçuyev bildirdi ki, maşın içkili vəziyyətdə tutulub və 25 gün cərimə meydançasında qalıb. Avtomobili oradan çıxartdıqdan sonra təmir etdirərək satıb. Cərimələrin ödənməsinə və təmirə də 2000 manatdan artıq xərc çəkib. Buna görə də Xalid Əliyevə pul qaytarmaq fikri yoxdur.

Mövzu ilə bağlı daha ətraflı videomaterialı təqdim edirik: