Ceyranların, flaminqoların əhatəsində piknik edin - Quraqlığın ortasındakı cənnət/ FOTOLAR

4265

Ekologiya və Təbii Sərvətlər Nazirliyi yeni layihəyə start verib.


BakuPost xəbər verir ki, layihə "Təbiətimiz evimizdir” adlanır. Layihə çərçivəsində Azərbaycanda ekoturizmin təbliği məqsədilə Milli Parkalara, qoruqlara media tur təşkili nəzərdə tutulub. Məqsəd KİV vasitəsilə yerli və xarici turistlərə Azərbaycanın gəzməli və görməli yerləri barədə məlumatın görüntü və yazı halında çatdırılması, ekoturizmi insanlar arasında təbliğ etməkdir.


Yaz-yay ayları ərzində hamının dediyi bir söz olur: "hara gedəsən axı, hər yeri gəzib görmüşük, getməyə yer də yoxdur”. Elə bu sözü deyənlərdən biri də biz özümüzük. Amma Azərbaycanda elə məkanlar, elə yerlər var ki, gözəlliyinə doyum yoxdur, heç birimiz də xəbərdar deyilik. Söhbət ümumi mövcudluğundan xəbərdar olmaqdan getmir, həmin yerdə istirahət etmək, müxtəlif canlılar görmək, vəhşi təbiətdə piknik etməyin mümkünlüyündən xəbərsiz olmaqdan gedir.


Belə yerlərdən biri də media tur çərçivəsində kəşf etdiyimiz Şirvan Milli Parkı oldu. Ümumi sahəsi 54 min hektar olan qoruğa vaxtında səfər etsəniz, burada hətta qızılqaz belə görə bilərsiniz. Ceyranlar isə ilin hər fəslində olur. Nazirliyin bioloji müxtəlifliyin qorunması departamentinin direktor müavini Hikmət Əlizadənin sözlərinə görə, Şirvan Milli Parkı əsasən yaz və payız aylarında gözoxşayan olur.

 

 

 

"Azərbaycanın ilk milli parklarındandır, ərazi etibarilə də ən böyüklərdəndir. Milli parkın təsis olunmasında əsas məqsəd ərazinin zəngin bioloji müxtəlifliyinin mühafizəsi, xüsusilə ceyran populyasiyasının mühafizəsidir. Çünki Avropanın ən çox ceyran məşkunlaşan ərazisidir.

 

Bu Milli Parkın yaradılmasından məqsədlərdən biri turistlər üçün şəraitin yaradılmasıdır. Milli parkın digər xüsusi mühafizə olunan yerlərdən fərqi onun turistlərin üzünə açıq olmasıdır”, - deyə H. Əlizadə vurğulayıb.


 

Milli Park ərazisində 11 turist marşrutu fəaliyyət göstərir. Müxtəlif əraziləri əhatə edir. Həm dəniz sahilini, həm də yarımsəhra ərazilərini.

 

Böyük ceyran populyasiyası olduğu üçün yırtıcı heyvanlar – canavar, çaqqal, tülküyə də rast gəlinir. Xüsusilə miqrasiya dövründə buranın ornitalogiya aləmi də zəngin olur.

 

Dünyanın qırmızı kitabına düşən bəzi quşlar burada qışlayır, sonra geri qayıdır.

 

Qırmızı kitaba düşən canlılardan ceyranı, qızılqazı, turacı misal göstərmək olar. Elə səfərimiz zamanı turacı da gördük.

 



H. Əlizadənin sözlərinə görə, Milli Parka heç bir insan müdaxiləsi edilmir. Bunun səbəbi isə vəhşi təbiətin özünün özünü balanslaşdırmasına şərait yaratmaqdır: "Burada ceyranların arıtırlması üçün heç bir plan yoxdur və ona ehtiyac da yoxdur. Çünki bu ərazinin xüsusi mühafizə rejiminin olması özü ceyranların artımına şərait yaradır. O şərait bizə imkan verdi ki, ceyranların Azərbaycanın digər tarixi ərazilərinə köçürülməsini təmin edək. 2010-cu ildən 7 il ərzində 171 baş ceyran Şirvan Milli Parkından xüsusi vasitələrlə tutulub Ağcəbədi, Qobustan, Goranboy, Abşeron Milli Parkı ərazisinə köçürülüb. Çox müsbət nəticələr alınıb.Amma Milli Park ərazisində ceyranların artırılmasına heç bir ehtiyac yoxdur.

 

Çünki Milli Parkların, qoruqların yaradılmasında məqsəd insan fəaliyyətinin azaldılması, tamamilə təcrid edilməsi, həmin ərazidə təbii bərpanın getməsinə şərait yaratmaqdır. Təbiət özü tənzimləyir, şərait yaradır ki, özü artsın, balans yaransın. İnsan müdaxilə etməzsə, ən yaxşı üsul elə vəhşi təbiətin özünün özünü balanslaşdırmasıdır”.

 


Bu ayları ceyranların balalama vaxtına təsadüf etdiyindən təkəmseyrək də olsa ceyran görə bildik. Nazirlik və qoruq əməkdaşları deyir ki, burada istənilən fəsildə ceyran görmək olar. Amma əsasən payız ayında səfər edənlər sürü ilə ceyran müşahidə edəcək.

 

Yəni Şirvan Milli Parkı yaz və payız aylarında daha cəlbedici olur. Çünki həm də bu fəsillərdə miqrasiya edən quşları müşahidə etmək olur.

 

 

Qoruqdakı 11 marşrutun siyahısı belədir:


1.Bəndovan dağı – Palçıq vulkanı

2.Yulğun puru

3.Flaminqo gölü

4.Göl Çip-Çipə

5.Estakada

6.Salaş müşahidə qülləsi

7.Giriş qapısı müşahidə qülləsi

8.Dəniz sahili-Laquna

9.Qırmızıqum

10.Bəndovan tarixi məkan

11.Giriş qapısı – Quştəsfi

 



Bəndovan orta əsrlərə aid qədim yaşayış məskəni olub. Sahildə və sualtında 100-200 metr dərinlikdə aparılmış arxeoloji tədqiqatlar zamanı burada dulus kürələri, orijinal şirli vəşirsiz qablar, şüşə bəzək əşyaları, əmək alətləri, sikkələr tapılıb. Ehtimal olunur ki, bu sahil şəhəri təkcə Xəzərin yüksələn səviyyəsi ilə deyil, vulkanın təsirindən də məhv olmuş ola bilər. Su altında qalmış şəhərin bəzi qalıqlarına qoruğun muzey köşəsində baxa bilərsiniz.

 


 

Şirvan Milli Parkının direktoru Füzuli Məmmədov ərazidə təxminən 230 növ su quşlarının, 82 bitki növünün mövcud olduğunu deyib. Yırtıcı heyvanlar isə əsasən çaqqal, tülkü və canavardır.

 

F. Məmmədov hesab edir ki, vəhşi təbiət olsa belə, insan müdaxiləsi zəruridir: "Bura vəhşi təbiətdir. Disbalans da olur, özü balanslaşır da. Lakin mövcud şəraitdə təbiət özü özünü tənzimləyir. Bir heyvanın sayı artırsa, digər heyvana zərər vurur. Məsələn, burada canavar üçün münbit şərait yaranıb. Canavar artdıqca ceyrana ziyan vurur. Gələcəkdə aidiyyəti qurumlar bununla bağlı öz rəyini bildirəcək. Mənə elə gəlir ki, balansı qorumaq üçün insan amili işə düşməlidir. Ona görə ki, canavarlar ceyrana çox ziyan vurmasın”.

 


 

Ərazidə yerləşən Qızılqaz gölü qoruğun maraqlı yerlərindəndir. Yaradılmış estakada ilə bir xeyli getdikdən sonra gölə açılan mənzərə insanı sakitləşdirir. Bu gölün flaminqo ilə dolu olduğunu düşünəndə isə mənzərənin miqrasiya dövründə nə qədər möhtəşəm olduğunu beynində canlandırmaq çətin olmur.

 

Burada olarkən öyrəndik ki, Azərbaycanın son toxunulmamış yarımsəhraları məhz bu parkın ərazisindədir.

 

Parka giriş böyüklər üçün 2 manat, uşaqlar üçün isə pulsuzdur.

 

Sonda nazirliyin mətbuat xidmətinin rəhbəri İradə İbrahimova layihənin məqsədinin məhz təbliğat və ekoturizmin inkişafına təkan vermək olduğunu deyib: "İstəyirik inanlar görsün ki, Azərbaycanda necə gözəlliklər var. Bununla yaxından tanış olsunlar. Təəssüf ki, milli parklara gələnlər ən çox xaricilərdir.

 

Məqsədimiz həm də yerli turistlərə təbliğ etməkdir”.


Milli Parkın 2 önəmli sloqanı da var:

 

"Özünüzdən sonra yalnız ayaq izlərini saxlayın”.

"Özünüzlə yalnız şəkillər və xatirələr aparın”.


Biz də media nümayəndələri olaraq milli parkdan xeyli xoş xatirə və şəkillər gətirdik.

 

Nigar Etibar

 




 

ŞƏRH YAZ
Şikayətinizi bizə yazın
Xəbərlərinizi bizə göndərin
WhatsApp: +994772701199

XƏBƏR LENTİ

Bütün xəbərlər
Bütün xəbərlər