Ru
22:57 / 18 Avqust 2017

Bu il hansı universitetlər tələbələrini yataqxana ilə təmin edəcək? - VİDEO

13975
Avqustun 15-dən etibarən tələbə adını qazanmış şəxslərin ali məktəblərdə qeydiyyatı aparılır. 


BakuPost.az-ın Xəzər TV-yə istinadən məlumatına görə, tələbələr arasında ailəsi regionlarda yaşayan gənclərin də sayı kifayət qədərdir. Belə olan halda elə tələbələrin mənzil şəraiti gündəmə gəlir. Onlar ya kirayədə qalmalıdırlar, ya da universitetlərin yataqxanalarında. 


Məlum məsələdir ki, universitetlərin yataqxanalarının əksəriyyətində məcbur köçkünlər yerləşdirildiyi üçün onları öz tələbələrini yataqxana ilə təmin etmək imkanları məhduddur.


Amma bu şəraiti az da olsa tələbələri üçün təmin edən ali təhsil müəssisələri var. Bu isə tələbatın çox olduğu bir şəraitdə universitetlərin tələbələri hansı meyarlar əsasında yataqxana ilə təmin etməsi məsələsini gündəmə gətirir. Məsələn Azərbaycan Memarlıq və İnşaat Universitetinin 5 yataqxanası olsa onların 4-də məcburi köçkünlər yaşasayır. Yerdə qalan bir yataqxana da isə tələbə yerləşdirmək imkanı var.


Universitetin Tələbə Həmkarlar İttifaqının sədri deyir ki, tələbat çox olduğundan müraciətlər araşdırılır və güzəştli sosial təbəqələrə üstünlük verilir.


Tibb Universitetinin isə imkanları nisbətən daha genişdir. Belə ki ali məktəbin hazırda 5 yataqxanası tələbələrin ixtiyarına veriləcək. Bunlardan ikisi qızlar, ikisi oğlanlar biri isə əcnəbilər üçün nəzərdə tutulub.


Universitetin Tələbə Həmkarlar İttifaqı Komitəsinin sədri Cahangir Qasımov deyir ki, bütün ali məktəblərdə olduğu kimi burada da yataqxanada qalmaq istəyən tələbələr ərizə ilə müraciət etməlidirlər. Seçim zamanı tələbələrin ailə vəziyyətləri nəzərə alınır.


Tələbələrlə 1 illik müqavilə bağlanılır. Növbəti illərdə yataqxanada qalmaq istəyənlər yenidən order almaq üçün müraciət etməlidirlər.


Geniş tələbə kontingentinə malik Bakı Dövlət və İqtisad, Mədəniyyət və incəsənət Universitetlərinin yataqxanalarında qaçqınlar qaldığından tələbələrə bu xidməti təklif etmək mümkün deyil.


Azərbaycan Dövlət neft və sənaye universitetinin 300 nəfərlik yataqxanası var. Aylıq ödənişlər 30 manat təşkil edir. Gələn ildən 1000 nəfərlik yeni binanın tikintisi gözlənilir. Azərbaycan dövlət pedaqoji və dövlət texniki universitetlərinin 5 yataqxanası olsa da, yalnız 1-də tələbələrin qalması üçün imkanlar var. Burada da tələbələrin yataqxana ilə təmini digər universitetlərdəki prinsiplər əsasında aparılır.


Özəl ali məktəblərə də ildən-ilə regionlarda yaşayan abituriyentlərin qəbul olmasının çoxaldığını nəzərə alsaq onların yataqxana şəraitinin yaxşı olması vacib amillərdəndir. Bakı Avrasiya Universiteti özəl ali məktəblər arasında yataqxana xidməti təklif edən yeganə universitetdir.


Qeyd edək ki, tələbə yataqxanalarından məcbur köçkünlərin köçürülməsi hazırda hökumətin də gündəmindədir. Bu iş mərhələli şəkildə həyata keçirilir.




BakuPost
Şərhlər
Bizi telegram-da izləyin
Bizi facebook-da izləyin
Bizi tiktok-da izləyin
Bizi youtube-da izləyin





Son xəbərlər
Çox oxunanlar
Son xəbərlər