Bakı Ürək Mərkəzi məşhur cərrahla niyə işləmədi? - Rəşad Mahmudovdan açıqlama

R. Mahmudov BakuPost-a verdiyi açıqlamada mərkəzlə müqavilə müddətinin uzadılmamasını belə şərh edib: "Bakı Ürək Mərkəzinə Mərkəzi Neftçilər Xəstəxanasından dəvət olunmuşdum və buradakı fəaliyyətimlə əlaqədar mənimlə 1 illik əmək müqaviləsi bağlanmışdı.

Müqaviləyə görə, əsas vəzifələrim Bakı Ürək Mərkəzində ürək cərrahiyyəsinin və mərkəzinin qurulması, müalicələrin təşkili, peşəkar tibb heyətinin yaradılması və yerləşdirilməsi, yeni prosedurların tətbiqi işlərinin təşkil olunmasına kömək etməkdən ibarət olub. Ümid  edirəm ki, qarşıma qoyulan məsələlərin öhdəsindən layiqincə gəlmişəm və Bakı Ürək Mərkəzi hazırda regionun qabaqcıl müalicə müəssisələrindən birinə çevrilib. Artıq müqavilənin müddəti başa çatıb. Verilən tapşırıqlar icra olunduğu üçün yenidən müqavilə müddətinin uzadılmasına zərurət duyulmayıb.

Bakı Ürək Mərkəzi özəl xəstəxanadır. Ona görə də, həmin xəstəxanaya işə təyinat və işdən azad etmə ilə bağlı sərəncamlar hörmətli səhiyyə naziri cənab Oqtay Şirəliyev tərəfindən verilmir". 

Cərrah son bir neçə ayda mətbuatda səhiyyə naziri təyin ediləcəyi ilə bağlı yayılan xəbərlərə də münasibət bildirib: "Hər zaman dost münasibəti bəslədiyim media mənsublarından xahişim budur ki, son 3 ayda xəbər saytlarında yayılan, həqiqətlə heç bir əlaqəsi olmayan, uydurma və absurd məlumatlara həssas yanaşsınlar. Mən həkim, müəllim və millət vəkiliyəm. Bir insan üçün bundan şərəfli iş ola bilməz. Bu adları ləyaqətlə daşımaqdan başqa amalım və hədəfim olmayıb, yoxdur və olmayacaq da. Tam əminliklə bildirirəm ki, hər zaman dövlətimizin və Prezidentimizin siyasətini uca tutmaqla, xalqımızın sağlamlığının keşiyində durmağı alın yazısı kimi qəbul etmişəm.  Gənc yaşlarımdan mənə göstərilən yüksək etimadı hər zaman doğrultmağı özümə borc bilmişəm. Odur ki, gənc yaşlarımda mənə göstərilən yüksək etimad nəticəsində malik olduğum bu dəyərlərə kölgə salan hər bir sözü, fikri, hərəkəti qətiyyətlə rədd edirəm”.

 

Qeyd edək ki, R. Mahmudovun Bakı Ürək Mərkəzindən getməsi ilə bağlı xəbəri BakuPost saytı yayıb. R. Mahmudov saytlmıza xəstəxanadan ayrıldığını təsdiqləyib.