Abbasov Gəncə reyslərinin ləğvinə qarşı - “Gərək, prezident irad bildirsin?”

Bakı-Gəncə-Bakı aviareysləri üzrə uçuşların ləğvi Gəncə sakinlərinin narazılığına səbəb olub. Gəncəlilər Bakı ilə hava nəqliyyatının kəsilməsinin düzgün olmadığını dilə gətirirlər.


BakiPost.az xəbər verir ki, Gəncənin sabiq millət vəkili Aydın Abbasov da bununla bağlı öz iradını səsləndirib. Bildirib ki, uçuşların ləğvi kommersiya ilə bağlı deyil: "Kommersiya adıyla məsələyə hər hansı bahanə gətirmək düzgün deyil. Gəncə ölkəmizin ikinci şəhəridir. Təəssüflər olsun ki, hələ də bu qərarı verənlər bunu anlamırlar. Gərək, ölkənin rəhbəri hər zaman sizə öz iradlarını bildirsin ki, sizdə funksional öhdəliklərinizi anlayasınız? Bu, prestij məsələsidir. Mütləq şəkildə bu aviareys bərpa olunmalıdır. Turizmin inkişafı naminə. Bundan başqa, ölkəmizin qərb bölgəsinin Bakı şəhəri ilə hava nəqliyyatını kəsmək olmaz”.


Aydın Abbasov qeyd edib ki, Gəncə şəhərinin etimad göstərilmiş və rəhbər şəxsləri bu məsələ ilə çox ciddi məşğul olmalıdır: "Bu barədə sakinlərə də məlumat verməlidirlər. Bir dəfə də belə hadisə baş vermişdi. Gəncənin o vaxtkı deputatları bu məsələni çox ciddi şəkildə qaldırmışdılar. Həmin deputatlar məsələnin həllinə nail olmuşdular”.

 

Qeyd edək ki, Bakı-Gəncə-Bakı aviareysləri yanvarın 9-dan ləğv edilib. AZAL-ın mətbuat xidmətinin rəhbəri Paşa Kəsəmənski uçuşların kommersiya baxımından səmərəli olmadığı üçün ləğv edildiyini bildirib.

 

Sevinc Yasinqızı

Bakı Post

Şikayətinizi bizə yazın
Xəbərlərinizi bizə göndərin
WhatsApp: +994772701199

XƏBƏR LENTİ

16 Oktyabr 2017
Bütün xəbərlər
Bütün xəbərlər